اخيس شي ...
لما تكونين مخطوبة ولا عندج مناسبة مهمة وتطلع بويهج نفرة لا وتتسلط بأماكن خايسة ما تترقع (الخشم - بين الحواجب) اي ليييش عاد
اخيس شي ...
لما يكون مودج زفت ومالج خلق تلبسيين وتهلقين عالآخر ومايبقى احد بالكويت وماتشوفينه ولو كاشخه ماتلقين احد كلش
اخيس شي ...
لما تكونين توج مالجة وطالعة مع ريلج مطعم لبناني وتاكلين تبولة وتلصق بين الضروس !! والله الفشلة اذا اشر وقالج اكو شي هني!! ودج تختفين
نصيحة ياللي توكم متزوجين ..وخري عن التبوله ورفيجاتها
اخيس شي ...
واحد يسألج جم عمرج وانت تقولين جم تحط علي ويعطيج عمر اكبر من عمرج الصجي .. صدمه وضيقة خلق
اخيس شي ...
لما تطلع اغنية حلوة وانتي تحبينها وتسوين روحج حافظتها يعني وتطلعين موحافظه شي بس ادندنين مع اللحن وحنه ورنه .. اي سكتي احسنلج
اخيس شي ...
لما تنعزمين على عرس وايد قريب وحدج تشتطين ومايبقى مكياج ماشريتيه ولما تحطينه يطلع ابو الهوالة والجكر ولو عرس مالج خلقه ولا مستعدة حقه يطلع شكلج عجيب
اخيس شي ...
لما تروحين الصالون وتسويلج تسريحه موعاجبتج وتجاملين تقولين اي جلوه على ابونا مفتشله !!! ولما ترجعين البيت تفلينها .. اي ليييش التفلسف دام موعاجبتج؟؟ ولا بعد يكون سعرها الفلاني .. صج حره
اخيس شي ...
لما تكونين شارية بدلة وحاطتها بالكبت فترة ولما تيين عقب تلبسينها ماتسكر !! وتقعدين تشفطين كل الهوا اللي بالدار الا تسكر ! اي لا تقصين على عمرج انت خايرته بالاكل وصايرة شمتنج
اخيس شي ...
تكونين ذابحة عمرج بالرجيم وحارمة روحج من كل مالذ وطاب وتوقفين عقب اسبوع عالميزان والا متنحر ماتحرك!! والصدمة اذا زايدة كيلو شلوووووون ؟؟
اخيس شي ...
لما تشوفج وحدة وتقولج متناااانه !! اي سكتي منو سألج !! نحاسة الحريم ياتقولين شي حلو والا احتفظي برايج حق نفسج
اخيس شي ...
وقت السفر اذا ابوج ولا ريلج قالج لاتاخذين هدوم وايد مانبي وزن زايد ولما تروحون المطار تطلع زايدة بالوزن ويخزج ذيييج الخزة !! وانتي بترقعين شلون وتقولين والله موحاطه شي .. وانتي حاطه كل الكبت جنه ماعندهم مجمعات وهدوم
اخيس شي ...
لما تتصنعين اول الزواج جدام ريلج وقت الاكل يعني ذربة وماتاكلين كل الصحن وانت بتموتيييين يوع ومن ادشين الدار اتفجين حلجج وياكره اذا ناسي شي .. لاتعليق الصراحه وانتي على شكلج جذي حده راح ينصدم
ويقول بقلبه ... اكليني انا بعد
اخيس شي ...
لما يكون ماخذج الطرب يعني وقاعده بالدار مجابله المنظره وتترقصين وتسوين حركات بويهج ويدشون عليج فجأه ....وييييع حده شكلج غلط وفشله
اخيس شي ...
لما تبين تجيسين نبض ريلج وتقوليله موجني متنانه ؟؟ ودي ادش نادي وبقلبج تقولين حلاته الحين يقولي ليش نادي شحلاتج ماله داعي .. ويصدمج برده ويقولج : اي دشي منو ماسكج روحي
اخيس شي ...
وقت الخطبة لما تتصنعين كل مايكلمج يقولج شنو تاكلين تقولين ساندويتش اشرب فراولة ووقت الزواج يطلبلج عصير فراوله تقوليله وع ماحبه!!كشفتي جذبتج .. اي ليش من الاساس تمثلين
اخيس شي ..
وقت الخطبة لما تتصنعين وتنعمين الصوت بتموتين من النعومة والذرابة ويدق تلفون البيت وفجأه اييج اخوج او اختج الص***ه وانتي تصارخين منووووووووووو شالحنه شتبووون !!! قمة الدفاشه واهوا مسكين عالخط منصدم وساكت
اخيس شي ...
لما تكونين حدج كاشخة ورايحة استقبال وتوج ماخذة الجاي وتطيح منج الاستكانة! ومن الفشلة تقولين عادي ماكوشي وتكونين محترقة بالصج بس من الفشلة توزعين ابتسامات جنه عادي
اخيس شي ...
لما تكونين لابسة كعب وموعارفة تمشين فيه بس غصب تلبسينه لانه ستايل وتمشين وتطيحين على جنب تتعرجبين اي شليحادج يعني ذابحج الستايل
اخيس شي ...
لما تكونين رايحة عرس وتطلع وحدة لابسة نفسج قمة الدقرة ماتتحركين من مكانج
اخيس شي ...
لما توج تاخذين الليسن تعالي شوفي السواقة الخايسة كله داعمه الرصيف عالجنب .. طول مانتي تسوقين
اخيس شي ...
لما يكون مودج ريلاكس وودج ترتاحين وتروحين سبا وتتسلط عليج وحدة قمة الدفاشة وحدها تعور وانتي تقوليلها شوي شوي تقولجnoooo u neeed this
يامن شراله من حلاله عله
اخيس شي ...
لما يصير شعرج مدهن ومالج خلق تسبحين ولااازم تطلعين وماكو وقت !! تروح الحبيبه تحط جل فوق الدهن
ولما يهف الهواا عليه تهف صووبنا الروايح
بنات عادي لاتستحون .. قولو الصج ..... اي موقف حاشكم وشنو سويتو عقبها وترا السالفه غشمره على الرغم من انه واقع حق البعض من البنات
الأربعاء سبتمبر 02, 2009 3:09 am
